កម្ពុជាបច្ចុប្បន្ន

តើបទចំរៀងនេះជាបទលោក ស៊ីន ស៊ីសាមុតឬ? សូមជួយខ្ញុំផង!

cambodiatoday — Tue, 12 May 2009 01:28:02 +0000

ខ្ញុំមានសេចក្តីស្នើមួយ សង្ឃឹមថាបងប្អូនទាំងអស់គ្នាអាចជួយខ្ញុំបាន។ មានបទចំរៀងខ្មែរមួយពីសម័យដើម ខ្ញុំសង្ស័យអ្នកច្រៀងគឺលោកស៊ីន ស៊ីសាមុត ក៏ប៉ុន្តែខ្ញុំមិនដឹងច្បាស់ទេ។ ខ្ញុំគិតថា បទហ្នឹងមានចំណងជើងថា “ នារីកាចតែអញ្ចឹង” តែខ្ញុំមិនច្បាស់ដែរ។ ទំនុកចំរៀងហ្នឹង មានច្រៀងថា “ ណ៎ៗៗៗៗ កុំកាចពេក គ្រាន់តែភ្នែកកួរឱ្យខ្លាច កាចជាងព្រាយបិសាច ឱ! ខ្លាចណាព្រលឹង…” តើបងប្អូនដែលឮទេ? តាមខ្ញុំដឹង បទនេះបានសម្តែងក្នុង ស៊ីឌី ឆ្លងដែន លេខ ១៣០ ក៏ប៉ុន្តែខ្ញុំរក ស៊ីឌីហ្នឹងមិនបានសោះ។ តើអាចជួយខ្ញុំបានឬទេ? តាមពិត ខ្ញុំមានបទនេះរួចហើយ មិនបាច់ផ្ញើមកខ្ញុំទេ។ ខ្ញុំគ្រាន់តែចង់ដឹងថា ទីមួយ តើអ្នកច្រៀងពិតជាលោកស៊ីន ស៊ីសាមុតឬ? ហើយទីពីរ តើបទនេះមានចំណងជើងអ្វីដែរ? បើបងប្អូនមានស៊ីឌី លេខ ១៣០ហ្នឹង អាចជួយថតចម្លងកំរបវា ផ្ញើមកខ្ញុំតាមអ៊ីមែលបានឬទេ (ដែលមានបញ្ជីបទចំរៀងនិងអ្នកច្រៀងនីមួយៗ)? ខ្ញុំបានធ្វើការស្រាវជ្រាវតាមអ៊ីនធើណែតយូរហើយ ហើយមិនបានទទួលចម្លើយនៅឡើយទេ។ ការណ៍នេះប្រញាប់បន្តិច ដូច្នេះបើបងប្អូនស្គាល់បទនេះ សូមឆ្លើយប្រាប់ខ្ញុំភ្លាមដោយបានចែងវិចារលើប្លកនេះ។ ប្រសិនបើបងប្អូនមិនស្គាល់ទេ ប៉ុន្តែស្គាល់ទីកន្លែងផ្សេងទៀតដែលប្រហែលជាមានពត័មានអំពីរឿងនេះ សូមណែនាំឱ្យខ្លួនខ្ញុំស្គាល់ផង។
សូមអរគុណទុកជាមុន!!!

ជំលោះព្រំដែនគួរឱ្យដោះស្រាយយ៉ាងឆាប់

cambodiatoday — Thu, 13 Nov 2008 11:21:16 +0000

ជំលោះព្រំដែនកម្ពុជា ថៃ មិនគួរឱ្យបន្តយូរទៅមុខទៀតទេ ប្រសិនបើវាបន្តឱ្យយូរទៅ នោះនឹងធ្វើឱ្យកម្ពុជាទទួលរងលទ្ធផលកាន់តែអាក្រក់។ ឥឡូវ កម្ពុជាមាននូវភស្តុតាង ផែនទី ហើយនិងសន្ធិសញ្ញាគ្រប់គ្រាន់ដើម្បីគាំទ្រការអះអាងរបស់ខ្លួន ជាពិសេសមានទម្លាប់ច្បាប់មកពីសេចក្តីសំរេចរបស់តុលាការយុត្តិធម៌អន្តរជាតិ កាលពីឆ្នាំ១៩៦២។ តុលាការនោះបានពិនិត្យទម្លាប់របស់ថៃ បានឃើញថាថៃធ្លាប់មានឱកាសជាច្រើនដើម្បីជំទាស់បដិសេធសន្ធិសញ្ញាជាមួយបារាំង ក៏ប៉ុន្តែមិនដែលធ្វើទេ ហើយបានឃើញថា ពួកថៃបានគោរពតាមសន្ធិសញ្ញានោះដែរ មិនបានជំទាស់តវ៉ាទេ ហេតុដូច្នេះហើយតុលាការបានប្រគល់ប្រាសាទព្រះវិហារទៅកម្ពុជា។ ប្រសិនបើកម្ពុជានឹងដាក់ពាក្យបណ្តឹងទៅតុលាការអន្តរជាតិ នោះកម្ពុជាច្បាស់ជាត្រូវឈ្នះ ក៏ប៉ុន្តែ ប្រសិនបើខ្មែរឱ្យជំលោះនេះបន្តយូរទៅមុខទៀត នោះទម្លាប់ច្បាប់ពីឆ្នាំ១៩៦២នឹងមានអនុភាពកាន់តែតិចទៅៗ ព្រោះសមាគមន៍អន្តរជាតិនឹងសួរថា បើដីនេះពិតជាដីរបស់ខ្មែរមែន ហេតុអ្វីកម្ពុជាមិនបានដាក់ពាក្យបណ្តឹង ដោះស្រាយឆាប់ៗនោះ? ពួកគេនឹងចាប់មានភាពមន្ទិលសង្ស័យ គិតថាកម្ពុជាគ្មានទំនុកចិត្តទៅលើការអះអាងរបស់ខ្លួន បើមានទំនុកចិតមែន ហេតុអ្វីបន្តការចរចាដោយឥតបានការ? ជាពិសេស ក្នុងការចរចាទាំងអស់នោះ ពួកថៃអាចចាប់ពាក្យណាមួយដែលខ្មែរនិយាយ យកមកប្រើប្រាស់ប្រឆាំងនឹងខ្មែរវិញ។ កម្ពុជាមិនគួរឱ្យបន្តការចរចាទាំងនេះទៀតឡើយ។

យូរៗទៅ សមាគមន៍អន្តរជាតិនឹងទទួលស្គាល់ថា ទឹកដីនេះជាដីជំលោះអចិន្ត្រៃយ៍ ដូចជាតំបន់ខាសមីរ៍នៅឯប្រទេសឥណ្ឌា ឬកោះសាយប្រឹស ឬតំបន់ផ្សេងៗទៀត ដែលមានទាហានប្រឈមមុខគ្នាជារៀងរាល់ថ្ងៃជាយូរឆ្នាំមកហើយ តំបន់ទាំងអស់នោះត្រូវបានទទួលស្គាល់ថាជាតំបន់ជំលោះអចិន្ត្រៃយ៍ ព្រោះគ្មាននរណាហ៊ានចាត់វិធានការដោះស្រាយឡើយ។ កម្ពុជាមិនគួរឱ្យមានស្ថានការណ៍ដូច្នេះកើតឡើងទេ គឺត្រូវប្តឹងទៅតុលាការអន្តរជាតិភ្លាមៗ។

ក្នុងភាសាអង់គ្លេសមានពាក្យពេចន៍ថា “ ប៉ាកកាមានឥទ្ធិពលខ្លាំងជាងដាវ” បានន័យថា ចំណេះដឹងរបស់មនុស្ស មានឥទ្ធិពលនិងអនុភាពខ្លាំងជាងកងកម្លាំងយោធា។ ក្នុងជំលោះនេះ កម្ពុជាមានភាពទន់ខ្សោយខាងយោធាមែន មិនអាចឈ្នះដោយដាវបានឡើយ ក៏ប៉ុន្តែ កម្ពុជាមានអាវុធដ៏ខ្លាំងជាងគេបង្អស់ គឺជាប៉ាកកា។ ខ្មែរមិនគួរឱ្យខាតពេលទៀតឡើយ ចូរលើកអាវុធដ៏មានឥទ្ធិពលខ្លាំងជាងគេបង្អស់ចុះ ហើយចុះហត្ថលេខាទៅលើពាក្យបណ្តឹងជាមិនខាន!!!៕

ហេតុអ្វីខ្មែរចូលចិត្តមើលងាយភាសាខ្លួនឯង?

cambodiatoday — Sun, 02 Nov 2008 02:47:03 +0000

ខ្ញុំសែនឆ្ងល់មែនទែន ហេតុអ្វីខ្មែរចាត់ទុកថា ភាសាខ្លួនឯងគ្មានតំលៃ? ខ្ញុំធ្លាប់បានដើរលេងនៅច្រើនប្រទេស ហើយខ្ញុំបានពិនិត្យស្ថានភាពភាសាក្នុងប្រទេសទាំងអស់នោះ។ កម្ពុជាពិតជាខុសប្លែកពីគេឆ្ងាយណាស់។

សេចក្តីប្រៀបធៀបនឹងប្រទេសនានា

ពេលខ្ញុំបានដើរលេងនៅប្រទេសថៃ ខ្ញុំបានសង្កេតមើលបុគ្គលិកក្នុងហាង ពេលមានភ្ញៀវបរទេសចូលមក ឃើញបុគ្គលិកនិយាយភាសាថៃជាមួយគេ។ នៅកម្ពុជាវិញ ហាក់ដូចជាគ្មានអញ្ចឹងសោះ គឺពេលជួបជនបរទេស ខ្មែរតែងតែព្យាយាមនិយាយអង់គ្លេសជាមួយគេ។ ពួកថៃដឹងហើយថា ជនបរទេសទាំងនោះ មុខជាមិនអាចស្តាប់ភាសាថៃបានទេ ក៏ប៉ុន្តែ ពួកគេនៅតែនិយាយភាសាថៃជាមួយគេដែរ។ ហេតុអ្វីទៅ? បានប្រយោជន៍អី? គឺដោយសារពួកថៃជឿថា ភាសាហើយនិងប្រទេសជាតិរបស់គេមានតំលៃ បើទេសចរណ៍មកលេងស្រុកគេ នោះត្រូវជួបប្រទះនឹងភាសារបស់គេដែរ។ ជួនកាលពួកគេចេះនិយាយភាសាអង់គ្លេសផង ប៉ុន្តែនៅតែនិយាយថៃដដែល។

ជាឧទាហរណ៍មួយទៀត នៅប្រទេសអូទ្រីស ជនណាដែលមានអាយុក្រោមសាមសិបឆ្នាំ ស្ទើរតែចេះនិយាយភាសាអង់គ្លេសទាំងអស់ ក៏ប៉ុន្តែ ពួកគេមិនដែលនិយាយភាសាអង់គ្លេសជាមួយជនបរទេសឡើយ ទាល់តែយើងសូមឱ្យគេនិយាយភាសាអង់គ្លេស ទើបគេនិយាយ។ ផ្លាកតាមផ្លូវតាមហាងអី ភាគច្រើនត្រូវសរសេរជាភាសាអាល្លឹម៉ង់ កម្រឃើញអង់គ្លេសណាស់។ ពេលខ្ញុំបានទិញសិមកាតសំរាប់ទូរស័ព្ទដៃខ្ញុំ សៀវភៅណែនាំគ្មានការបកប្រែជាភាសាអង់គ្លេសឡើយ។ បើប្រៀបធៀបជាមួយខ្មែរវិញ ពិតជាខុសគ្នាណាស់។ នៅភ្នំពេញ មានកន្លែងខ្លះដែលគ្មានផ្លាកខ្មែរ ប៉ុន្តែមានផ្លាកអង់គ្លេស សូម្បីតែផ្លាកឡានថ្មីៗ ក៏គ្មានអក្សរខ្មែរដែរ! ហេតុអ្វីខ្មែរបានធ្វើដូច្នេះ? តាមពិត ពេលខ្មែរធ្វើអញ្ចឹង មានការប៉ះពាល់ដល់ផលប្រយោជន៍ខ្លួនឯងដែរ ព្រោះខ្មែរនៅកម្ពុជាមិនអាចអានបាន។ ជាយូរឆ្នាំមកហើយ កម្ពុជាបានមានសៀវភៅពណ៌លឿងបោះពុម្ពជាភាសាអង់គ្លេស ក៏ប៉ុន្តែគ្មានខ្មែរទេ! ចុះបើខ្មែរនៅស្រុកខ្មែរមិនអាចរកភាសារបស់ខ្លួន តើត្រូវរកនៅទីណាវិញ? ការធ្វើដូច្នេះមានការប៉ះពាល់ដល់សេដ្ឋកិច្ចកម្ពុជាដែរ។ បើខ្មែរចង់ទិញវត្ថុអ្វីមួយ ហើយចង់រកតាមសៀវភៅពណ៌លឿងនោះ តើម្នាក់នោះត្រូវធ្វើអីបើអានអង់គ្លេសមិនកើត? មិនអាចរកបានឡើយ។ ខ្ញុំសូមជម្រាបថា នៅពេលថ្មីៗនេះ សៀវភៅពណ៌លឿងទើបបានចេញជាភាសាខ្មែរ (http://www.yellowpages-cambodia.com/km/) ប៉ុន្តែហេតុអ្វីវាយឺតម្ល៉េះ? ខ្មែរនៅកម្ពុជាគួរឱ្យជំរុញជនបរទេសឱ្យរៀនភាសារបស់ជាតិ មិនមែនត្រូវជំរុញខ្លួនឯងឱ្យរៀនភាសាគេឡើយ! ពេលធ្វើអញ្ចឹង ហាក់ដូចជាខ្មែរទទួលស្គាល់ថា ភាសាគេគ្មានប្រយោជន៍អ្វីសោះ។

ការសិក្សាភាសាអង់គ្លេស មិនមែនជាគន្លឹះសំរាប់ការអភិវឌ្ឍប្រទេសឡើយ

ខ្ញុំបានចំណាយពេលយូរនៅឯប្រទេសជប៉ុន ហើយខ្ញុំបានសង្កេតឃើញថា ជនជាតិជប៉ុនមិនសូវចេះនិយាយភាសាអង់គ្លេសទេ ទាំងក្មេងទាំងចាស់អត់ចេះទាំងអស់! អង្គហេតុនេះប្រហែលជានឹងធ្វើឱ្យខ្មែរភ្ញាក់ផ្អើលបន្តិច ព្រោះប្រទេសជប៉ុនជាប្រទេសជឿនលឿន មានសេដ្ឋកិច្ចលេខទី២ក្នុងពិភពលោក បើមិនចេះអង់គ្លេស ហេតុអ្វីប្រទេសជប៉ុនខ្លាំងម្ល៉េះ? គឺមកពីជប៉ុនជឿថា មុខជំនាញមានតំលៃច្រើនជាងចំណេះភាសា។ ជប៉ុនជឿថា ជាការសំខាន់បំផុត ត្រូវរៀនមុខជំនាញខាងណាមួយ ដូចជាខាងច្បាប់ ពេទ្យ ។ល។ បើមានពេលរៀនភាសា រៀនទៅ ប៉ុន្តែការសិក្សាភាសាមិនសូវសំខាន់ដូចជាការសិក្សាមុខជំនាញទេ។ ហេតុដូច្នេះហើយ ប្រទេសជប៉ុនមានជនឯកទេស នឹងអ្នកជំនាញការណ៍យ៉ាងច្រើន ដែលមានចំណេះវិជ្ជា និងការប៉ិនប្រសព្វគ្រប់យ៉ាង។ ដោយហេតុនេះហើយបានជាប្រទេសជប៉ុនជាប្រទេសជឿនលឿន មិនមែនមកពីរៀនភាសាអង់គ្លេសទេ!!! បើប្រៀបធៀបប្រទេសជប៉ុនជាមួយនឹងកម្ពុជាវិញ ខ្មែរពិតជាគិតផ្ទុយគ្នាណាស់។ ខ្មែរគិតថា ត្រូវរៀនភាសាអង់គ្លេស ទើបប្រទេសអាចមានការជឿនលឿនបាន។ ខ្ញុំបានជួបនិស្សិតខ្មែរច្រើនដែលអះអាងថា បើមិនចេះអង់គ្លេស នោះមិនអាចរកការងារបានឡើយ។ ខ្ញុំសូមសួរទៅវិញ តើអ្នកចង់រកការងារខាងអី? បើចង់ធ្វើជាអ្នករត់តុនៅភោជនីយដ្ឋានសំរាប់ជនបរទេស នោះត្រូវតែចេះមែន។ ចុះបើអ្នកចង់រកការងារជាវិស្វករ តើចំណេះមួយណាសំខាន់ជាង ចំណេះខាងវិស្វករ ឬចំណេះភាសាអង់គ្លេស? ច្បាស់ជាចំណេះវិស្វករ! បើមានបញ្ហាភាសា នោះគេអាចជួលអ្នកបកប្រែបាន។ ខ្ញុំបានលើកឡើងឧទាហរណ៍នេះដើម្បីបញ្ជាក់ថា ការសិក្សាភាសាអង់គ្លេសមិនមែនជាគន្លឹះសំរាប់ការអភិវឌ្ឍជាតិឡើយ!!!

សេចក្តីសន្និដ្ឋាន

ពេលប្រព័ន្ធកុំព្យូទ័រខ្មែរយូនីកូដបានចេញថ្មីៗ ខ្ញុំសែនសប្បាយចិត្តណាស់ ប៉ុន្តែខ្ញុំនៅតែពិបាកចិត្តព្រោះខ្មែរមិនសូវប្រើ។ អ្នកខ្លះនិយាយថា គេមិនចង់ប្រើទេ ព្រោះ “ ចង់រៀនអង់គ្លេស“ ។ នេះហើយជាមុខសញ្ញាមួយអំពីបញ្ញា “ ការមើលងាយភាសាខ្លួនឯង“ ។ បញ្ហានេះមិនមែនជាបញ្ហាថ្មីនៅកម្ពុជាទេ តាំងពីជំនាន់ដើមមក ខ្មែរតែងតែបានឱបស្រឡាញ់អ្វីៗដែលទាក់ទងនឹងបរទេស។ នៅសម័យដើម ចូលចិត្តតែបារាំង ឥឡូវបែរទៅជាភាសាអង់គ្លេសនឹងអាមេរិកទៅវិញ។ ហេតុអ្វីមិនបានស្រឡាញ់ភាសាជាតិ ដូចជាពួកថៃ អូទ្រីស នឹងជប៉ុននោះ ? ការគាបសង្កត់ភាសាជាតិបានធ្វើឱ្យមានការរអាក់រអួលដល់ការអភិវឌ្ឍជាតិ។ ក្នុងប្រទេសកម្ពុជា មានមនុស្សច្រើនដែលចេះនិយាយភាសាអង់គ្លេសខ្លះៗ ប៉ុន្តែមិនសូវមានអ្នកឯកទេស ឬអ្នកជំនាញការណ៍ខ្ពង់ខ្ពស់ទេ។ ការអភិវឌ្ឍជាតិតម្រូវឱ្យមានអ្នកជំនាញ ហើយការមានអ្នកជំនាញ តម្រូវឱ្យប្រតិបត្តិការណ៍ដោយភាសាជាតិ។

ការប្រកាសនេះគ្មានបំណងចង់រិះគន់ដល់ខ្មែរណាដែលរៀនភាសាអង់គ្លេសទេ។ ភាសាអង់គ្លេសជាភាសាសំខាន់ ជាភាសាអន្តរជាតិ ប៉ុន្តែសូមកុំរៀនភាសាអង់គ្លេសជំនួសមុខជំនាញណាមួយទេ។ សូមកុំបោះបង់ចោលភាសាជាតិ! គោលដៅទាំងនេះ ច្បាស់ជាមានសរៈសំខាន់ច្រើនជាងគេ ! សូមកុំមើលងាយភាសាខ្លួនឯង!៕

កុនអំពីចំរៀងខ្មែរ

cambodiatoday — Sun, 17 Aug 2008 08:55:23 +0000

នៅពេលថ្មីៗនេះ ខ្ញុំបានមើលកុនមួយអំពីចំរៀងខ្មែរ គឺជាកុនដែលបានតាមដានថតក្រុមតន្ត្រី Dengue Fever នាពេលពួកគាត់បានទស្សនាទឹកដីកម្ពុជា។ ខ្ញុំដឹងហើយថា បានសរសេរច្រើនណាស់អំពីក្រុមតន្ត្រីនេះហើយ ក៏ប៉ុន្តែ កុននេះល្អមើលណាស់ ធ្វើឱ្យខ្ញុំចង់ចែកចាយជាមួយនឹងអ្នកអានទាំងអស់។ កុននោះមានចំណង់ជើងថា Sleepwalking Through the Mekong វាមិនគ្រាន់តែបានបង្ហាញរឿងចំរៀងទេ តែបានបំភ្លឺទំនៀមទម្លាប់ខ្មែរផងដែរ។ សូមអញ្ជើញមើលវិបសៃតខាងក្រោមនេះ ដើម្បីមើលពេលវេលានិងទីកន្លែងនៃការបញ្ចាំងកុននេះ៕

http://sleepwalkingthroughthemekong.com/screenings.htm

សាមគ្គីភាព

cambodiatoday — Fri, 08 Aug 2008 03:08:21 +0000

នាពេលបច្ចុប្បន្ន អ្វីដែលប្រទេសកម្ពុជាត្រូវការជាទីបំផុត គឺជាសាមគ្គីភាព។ រូបខ្ញុំផ្ទាល់តែងតែមានការខ្វែងគំនិតជាមួយនឹងមេដឹកនាំនានា ក៏ប៉ុន្តែ ក្នុងសភាពវិបតិ្ត យើងត្រូវបោះបង់ចោលនូវការលំអៀងផ្នែកនយោបាយរបស់ខ្លួន ហើយនិងត្រូវគាំទ្រប្រទេសជាតិ មិនមែនត្រូវគាំទ្រគណបក្សរបស់ខ្លួននោះឡើយ។ តើអ្វីទៅជាវិបត្តិដែលខ្ញុំបាននិយាយមិញនោះ? គឺជាការឈ្លានពានរបស់ប្រទេសជិតខាងទៅលើទឹកដីកម្ពុជា។ ក្នុងសង្គ្រាមស៊ីវិលនៃសហរដ្ឋអាមេរិក លោកប្រធានាធិបតី អាប្រាហាំ លីនកុន បានមានប្រសាសថា “ អស់ទាំងនគរណាដែលបែកខ្ញែកទាស់តែគ្នាឯង មិនអាចចៀសផុតពីការវិនាសនោះឡើយ” ។ ប្រសិនបើកម្ពុជាមានសាមគ្គីភាពផ្នែកនយោបាយ នោះអាចចៀសផុតពីការវិនាសបាន ហើយអាចបន្សល់ទុកទឹកដីនេះជាកម្មសិទ្ឋិរបស់ខ្មែរ។

មានផ្លូវតែមួយដើម្បីឈ្នះល្បិចរបស់អ្នកឈ្លានពាននោះ គឺជាច្បាប់អន្តរជាតិ ជាផ្លូវដែលធ្លាប់បាននាំមកនូវលទ្ធផលដ៏ល្អសម្រាប់ខ្មែរ កាលពីឆ្នាំ១៩៦២។ ប្រសិនបើខ្មែរនឹងយកជម្លោះនេះ ជូនទៅអង្ការសហប្រជាជាតិ នោះយើងច្បាស់ជាត្រូវទទួលបានការដោះស្រាយដ៏ល្អបំផុតសម្រាប់ខ្មែរជាមិនខាន។ ភាគីខ្មែរមានភស្តុតាំងដើម្បីគាំទ្រការអះអាងរបស់ខ្លួន គឺរួមមាននូវផែនទី ទម្លាប់ច្បាប់ នឹងសន្ធិសញ្ញា។

ការដោះស្រាយតាមសមរភូមិមិនមែនជាដំណោះស្រាយល្អចំពោះកម្ពុជាទេ គឺមកពីកងកម្លាំងរបស់ប្រទេសឈ្លានពានមានកម្លាំងច្រើនជាងខ្មែរ ហើយម្យ៉ាងទៀត ប្រសិនបើវិបត្តិនេះត្រូវបណ្តាលឱ្យផ្ទុះអាវុធ នោះប្រសាទព្រះវិហារប្រាកដជាត្រូវរងការបែកបាក់ធ្ងន់ធ្ងរមួយចំនួន។ ប្រសិនបើកម្ពុជានឹងយករឿងនេះមកលើកឡើងទៅ អ.ស.ប. នោះរឿងនេះនឹងត្រូវបានដោះស្រាយដោយសន្តិវិធី ហើយផ្តល់លទ្ធផលដ៏ល្អដែរ។

ហេតុដូច្នេះហើយ សូមផ្អាកនូវអារម្មណ៍នយោបាយសិន ហើយរួមគ្នាគាំទ្រនាយករដ្ឋមន្ត្រីខ្មែរក្នុងការប្រឆាំងនឹងសត្រូវជាតិ!

ក្រុមតន្ត្រី Dengue Fever បានចេញស៊ីឌីថ្មីមួយទៀតហើយ

cambodiatoday — Sun, 27 Jan 2008 05:59:42 +0000

កាលពីប៉ុន្មានថ្ងៃមុន ក្រុមតន្ត្រី Dengue Fever បានចេញស៊ីឌីថ្មីមួយទៀត គឺមានចំណងជើង Venus on Earth។ ខ្ញុំទើបបានទទួលស៊ីឌីនោះពីថ្ងៃមិញ ហើយបទទាំងឡាយនោះពិរោះណាស់។ ខ្ញុំសូមជំរុញបងប្អូនទាំងអស់គ្នាឱ្យទិញស៊ីឌីនេះទៅ ហើយកុំយកបទទាំងនោះដោយថតចម្លងខុសច្បាប់ទេ។ កាលណាដែលយកបទដោយខុសច្បាប់អញ្ចឹង ធ្វើឱ្យស្នាដៃរបស់សុល្បៈករគ្មានរង្វាន់ ហើយយូរៗទៅ គេនឹងលែងផលិតភ្លេងទៀត។ បើចង់សាកស្តាប់ សូមមើលវេបសៃតរបស់ពួកគាត់នៅ www.denguefevermusic.com។

ចំរៀងខ្មែរ

cambodiatoday — Mon, 17 Dec 2007 06:00:34 +0000

ខ្ញុំតែងតែស្តាប់ចំរៀងខ្មែរ ជាពិសេសចំរៀងប្រភេទសម័យដើម ព្រោះខ្ញុំជឿថា ចំរៀងថ្មីៗ គឺមិនមែនជាចំរៀងខ្មែរឡើយ។ ពាក្យចំរៀង ចេញជាភាសាខ្មែរមែន តែភ្លេងមិនដូចខ្មែរយើងទេ។ ដោយមូលហេតុនេះហើយ បានជាខ្ញុំសែនអរក្នុងចិត្ត ដែលបានឃើញក្រុមភ្លេងមួយ ហៅថា Dengue Fever ដែលបានចាប់តែងបទខ្មែរថ្មី ដែលមានភ្លេងស្រដៀងនឹងភ្លេងសម័យដើម។ ប្រសិនបើអ្នកទាំងអស់គ្នាមិនទាន់បានស្តាប់ភ្លេងនេះទេ សូមសាកស្តាប់នៅ www.denguefevermusic.com។ អ្នកចំរៀងជាជនជាតិខ្មែរ ប៉ុន្តែសមាជិកដទៃទៀតក្នុងក្រុមភ្លេង គឺជាជនជាតិអាមេរិកាំង ក៏ប៉ុន្តែ ចំរៀងនេះពិតប្រកដជាចំរៀងខ្មែរ។ បទទាំងអស់របស់ពួកគាត់ ធ្វើឱ្យមានក្តីរំភើបក្នុងចិត្ត គ្មានអ្វីគួរឱ្យអផ្សុកសោះ។ ចូរតាមតានស្តាប់ឱ្យសប្បាយចុះ។

ចូរឱ្យមានគំនិតវិជ្ជមានចុះ!

cambodiatoday — Sun, 18 Mar 2007 08:50:03 +0000

ប្រជាជនខ្មែរនៅសហរដ្ឋអាមេរិក ហើយនិងនៅកម្ពុជាផង តែងតែត្អូញត្អែរអំពីសភាពការណ៍នៅកម្ពុជា ដោយមានសំដីថា ស្រុកខ្មែរពោពេញទៅដោយការពុករលួយ អ្នកចោរប្លន់ ភាពអសន្តិសុខ។ល។ ឥឡូវ ខ្ញុំសូមឆ្លើយតបការចោទប្រកាន់ទាំងនេះ។ ស្រុកខ្មែរប្រាកដជាមានឩបសគ្គក្នុងការអភិវឌ្ឍន៍ស្រុក ព្រោះថា ស្រុកខ្មែរទើបបានងើបពីសង្គ្រាម ក៏ប៉ុន្តែ ក្នុងពេលថ្មីៗនេះ ស្រុកខ្មែរបានចាប់មានការជឿនលឿនច្រើនជាងមុនណាស់។ ខ្ញុំបានទៅដល់កម្ពុជាជាលើកដំបូងនៅឆ្នាំ២០០១ ហើយខ្ញុំបានសង្កេតឃើញថា កម្ពុជានៅមិនទាន់បានធូរស្បើយពីជំនាន់សង្គ្រាមឡើយ ផ្លូវណាក៏រលាក់ ដើរពេលយប់មិនសូវហ៊ាន ហើយហាក់ដូចជាគ្មានអ្វីជឿនលឿនទាល់តែសោះ។ ពេលខ្ញុំបានជិះឡានតាក់ស៊ីពីបាត់ដំបងទៅភ្នំពេញ ខ្ញុំបានសួរអ្នកបើកបរថា “ ប៉ុន្មានម៉ោងទៀតបានជាយើងមកដល់ភ្នំពេញ?” គាត់បានឆ្លើយថា “ យើងមកដល់ហើយ!” ខ្ញុំបានសួរវិញថា “ ចុះភ្នំពេញមានផ្លូវដីដែរ?” ពាក្យឆ្លើយតបរបស់គាត់តទៅនោះ ពិតប្រាកដជាមានអត្ថន័យពិសេស គឺថា “ បើអត់មានផ្លូវដី នោះយើងមិនមែននៅស្រុកខ្មែរទេ!” បច្ចុប្បន្ននេះ មិនចាំបាច់ជិះតាក់ស៊ីពីបាត់ដំបងទៅភ្នំពេញទេ ហើយមិនបាច់ធ្វើដំណើរអស់រយះពេល៨ម៉ោងតាមផ្លូវរលាក់ដែរ គឺអាចជិះឡានក្រុងដែលគិតតំលៃថោក អស់រយះពេល៤ទៅ៥ម៉ោងប៉ុណ្ណោះ ហើយផ្លូវកៅស៊ូមានផង! នេះជាការផ្លាស់ប្ដូរធំមួយក្នុងរយះពេលមួយដ៏ខ្លី! នៅភ្នំពេញសុទ្ធតែមានផ្លូវកៅស៊ូ មានផ្សារទំនើបទាន់សម័យ (ផ្សារសុរិយា) ហើយមានវត្ថុផ្សេងៗទៀត ដូចជាម៉ាស៊ីនបើកលុយ ដែលធ្វើឱ្យការរស់នៅ មានភាពកាន់តែស្រួល។ សូម្បីតែកម្មវិធីវាយអក្សរខ្មែរដែលខ្ញុំកំពុងប្រើនេះ ជាផលិតផលនៃការអភិវឌ្ឍន៍ដ៏អស្ចារ្យនេះ។ នៅពេលថ្មីៗនេះ ទស្សនាវដី្តអន្តរជាតិមួយ ដែលដាក់ឈ្មោះថា “ អ្នកសេដ្ឋកិច្ច ” (The Economist) បានបោះពុម្ពអត្ថបទមួយអំពីស្រុកខ្មែរ ហើយបានបញ្ជាក់ថា ធម្មតា ការផ្សាយរបស់គេអំពីស្រុកខ្មែរ សុទ្ធតែផ្សាយពីរឿងកម្សត់ខ្លោចផ្សា ប៉ុន្តែ បច្ចុប្បន្ននេះ កម្ពុជាបានងើបពីសង្គ្រាមហើយ ហើយសេដ្ឋកិច្ចខ្មែរ មានដំណើរការកាន់តែខ្លាំងឡើង។ ដូច្នេះ កុំពិបាកចិត្តពេក ហើយចូរមានគំនិតវិជ្ជមានចុះ ស្រុកខ្មែរមានបញ្ហាក្នុងការអភិវឌ្ឍន៍ស្រុកមែន ប៉ុន្តែឥឡូវស្រុកខ្មែរមានដំណើរការទៅមុខហើយ !

កម្ពុជា​បច្ចុប្បន្ន

តើ​បទ​ចំរៀង​​នេះ​ជា​បទ​​លោក ស៊ីន​ ស៊ីសាមុត​ឬ? សូម​ជួយ​ខ្ញុំ​ផង!

ជំលោះ​​ព្រំដែន​​គួរ​​​ឱ្យ​ដោះ​ស្រាយ​យ៉ាង​ឆាប់

ហេតុ​អ្វី​ខ្មែរ​ចូលចិត្ត​មើល​ងាយ​ភាសា​ខ្លួន​ឯង?

កុន​អំពី​ចំរៀង​ខ្មែរ